ممثلة مصرية، ولدت في حي العجوزة بمدينة القاهرة، اكتشفها في بداياتها المخرج حسام الدين مصطفى، وأيضًا الفنان جورج سيدهم الذي ضمها لفرقة ثلاثي أضواء المسرح، ومن أهم أعمالها السينمائية: (مين فينا الحرامي، بديعة مصابني، أبناء الصمت، ديل السمكة). ومن أهم أعمالها التليفزونية: (بدون ذكر أسماء، شيخ العرب همام، عفاريت السيالة، الرحايا).
كشفت الفنانة فريدة سيف النصر عن تعرضها للسرقة من قبل السيدة التي تساعدها في المنزل، وذلك عبر بوست نشرته على حسابها الرسمي بموقع “فيس بوك”.
وأوضحت “فريدة اختفاء العديد من متعلقاتها الشخصية إلى جانب اكسسواراتها، و أطقم كاملة من مخدات وأدوات المطبخ”.
وعلقت “فريدة” قائلة: “أنا بتسرق بقالي شوية حلوين، لما يكون عندك حد نافعك اوي لأن مش اي حد يحب الكلاب، وانت كل شوية حاجات بتتاخد بجد مش هزار وحاجات باينه أوي يعني هدوم مش أي حاجه لازم ينقصوا يتاخدوا على نصين مرتين واختفاء قسري، ترجع ترمي لك نص فاتتهيل انك انت اللي مادورتش وفجأه اختفاء كامل”.
واستكملت:”ده بقى غير مفروشات قسما بالله اطقم كامله بمخداتها ونظارات اكسسوار جزم ادوات مطبخ كامله والله العظيم ما بقي في حاجه كامله خالص أول بأول”.
وأضافت: “ومافيش حد تاني بيعمل الحاجات دي خالص عشان تشك في اتنين أول ماتغير مكان حاجه بحجة النظام اعرف إنها هتاخدها أو تلخبط الإدراج وكله يتكعبل في كله، أما أنا فانشغل في حاجات وحاجتي فعلا تختفي أعمل إيه، اواجهها وأنا مابحبش أحرج حد واجرحه ولا أمشيها واحتاس ودول عائلة كاملة نافعاني سواق نظافة ام مني غسيل، ولا اروح عندهم على غفله زي ماقالولي، وطبعا مش ممكن أبدا أعمل كده بس بجد زهقت ومحتارة”.
واختتمت:”سرقه علني وطبعا بيتفتح عليا بالمفتاح وانا في سابع نومه، ومع الأسف بدي الأمان لكل الناس، تعبت والله تعبت حسبي الله ونعم الوكيل، قولولي اعمل إيه؟”.
وشاركت “فريدة سيف النصر” مؤخرًا ببطولة مسلسل “جعفر العمدة” والذي حقق نجاحاً جماهيرياً ضخماً وقت عرضه بموسم رمضان الماضي، إلى جانب مشاركتها النجمة نيللي كريم بطولة مسلسل “عملة نادرة” وسط إشادات من قبل النقاد والجمهور معاً على أدائها بالعملين.
فريدة سيف النصر: هستفاد ايه لما أنفخ نفسي.. والبوتوكس نوع من سم التعابين
وعن رأيها في عمليات التجميل، قالت فريدة: أنا هستفاد إيه لما أنفخ نفسي وتجيلي بعدها أمراض كتيرة، وأنا جبانة جدًا وبخاف من الحقن.. وسعيدة بظهور التجاعيد على وشي، البوتوكس بينفخ الوش وبيجيب أمراض.. البوتوكس ده معمول من نوع من سم التعابين، ومعنديش مشكلة مع الشكل لأني لما اتنفخ وأتعب بعدها هستفاد ايه ربنا خلقنا كده وهنكمل كده.
كما تحدثت فريدة سيف النصر عن فترة حجابها، قائلة: أنا بخاف من الموت جدًا وجبانة جدًا، وبمجرد بشوف حيوان بيموت قدامي بيحصل لي رهبة، وأخويا مات عنده 21 سنة، ولما اتحجبت اتطلقت الطلقة التانية لأنه معجبش جوزي.
واستكملت حديثها: مبشفش قبر ولا بروح عزاء مش نداله مني ولكن مبقدرش، والوحيدة اللي جاتلي البيت واتحجبت بعديا علطول سوسن بدر وهي أختي في الرضاعة، وياما اتهزقت من عفاف شعيب بس رديت عليها واتصالحنا.. ومحدش قدر عليا، وقررت أخلع الحجاب لما دخلت مع ناس محجبات وعملنا محل مع بعض ومخدتش فلوس خالص منه.. وحسيت إني لازم أنزل اشتغل.
وقالت فريدة سيف النصر متحدثة عن خيانة زوجها لها مع صديقتها: زوجي اتعلق من بيتي وصاحبتي خطفته.. وكنت بسيبها تاكل وتشرب وأنرل أروح التصوير وأجيبلهم حاجات، وكانت من برا الوسط الفني.
وأضافت فريدة سيف النصر: اكتشفت الخيانة من التليفون.. رفعت سماعة التليفون وسمعت كلام لا يمكن أتخيله، وهو ضربني وقال لي دي جزمتها برقبتك، وطلبت الطلاق لأني عندي عزة نفس.. وكانوا متجوزين وأنا مكنتش عارفة، ومحمد ابني وهو صغير كان بيقول لي حاجات مخدتش بالي منها.
